Joua Yang

Joua Yang - NTSUAB YAAJ 1918 ~ 2016
Ntsuab Yaaj yug lub August 12, 1918 lubzog Pajkhas, Xeev Xeeskhuam, Lostsuas teb. Nwg namtxiv hu ua Npuag Leej Yaaj hab Txoo Vaaj. Ntsuab yog tug ntxhais hlub hab yog tug mivnyuas thib 2 ntawm nwg cov nugmuag. Nwg muaj 5 tug nug, taamsim nuav tseem tshuav tug nug ntxawg Ntsuab Rwg, nyob St. Paul, Minnesota hab nwg muaj 4 tug vivncaug. Ntsuab Yaaj hab Tsujxwm Hawj sibyuav khwvyeeg le 1940s hab tomqaab ntawd tsi tau ntau caum lub xyoo Tsujxwm kws yog nwg tug quasyawg tuag tso nwg sob namtubtseg. Obtug muaj ibtxwg tubnyaab - Txhaj Foom-Fuab (3 tug tub hab ib tug ntxhais xeebntxwv), hab muab ibtxwg ntxhais vauv Maiv –Txawj Nruag Vwj (3 tug tub hab 3 tug ntxhais xeebntxwv hab 9 tug tub-ntxhais lawm xeebntxwv).
Ntsuab yog ibleej namtsev zoo, paubtaab, tijlim, quag hab muaj lub sab dlawb sabzoo, ua ncaaj nceeg hab muaj lub sab dlaav fo qheb rooj lug tog qhua hab paab kwvtij neejtsaa. Nwg yog ib tug namtsev kws paub tshuaj ntsuab, txawj tu mobnkeeg yaam tsi yuav nqe zug.
Xyoo 1975 Ntsuab ua tuabneeg thojnam tawgrog tuaj nyob Noomqhais thaibteb. December 16, 1978 nwg tug txivdlaab Ntsuab Rwg txhaj tog nwg tuaj nyob lub nroog Kansas City, Kansas lug txug nub kws nwg tso nplajteb tseg July 23, 2016 thaus 7:36am huv KU Medical Center, Kansas City, Kansas kws muaj nwg tug Xf./Nxf. Txwj Ntxawg Hawj thov Vaajtswv muab nwg fij hab nyeem Luka 23: 43 "Yexus has tas, Kuv qha tseeb rua koj has tas, Nubnua ntaag koj yuav tau nrug kuv nyob sau qhovchaw tau zoo". Kuj muaj tubnyaab Txhajfoom, ntxhais vauv Txawjnruag Vwj hab coob tug xeebntxwv nyob lub sijhawm nwg taag simneej ntawd. Nwg tau tso nplajteb tseg hab ncaim nwg tsev tuabneeg moog ntsagtu moog nrug Vaajtswv nyob Ceebtsheej tebchaw tau zoo hab nyob kaajsab quaslug lawm. Peb yuav ncu ntsoov nwg txuj kev hlub, nwg lu lug hab lubntsej lubmuag moog kuas taag tam nuav, moog zoo os leejnam tug ntxim hlub hab tug kws muaj kev hlub. Ntsuab hab nwg tsevneeg lug ntseeg Yexus Khetos khwv laam le 1951S nyob zog Bo-Oo, nwg tau ua kevcai rausdlej nyob yeej thojnam tawgrog Noomqhais, Thaibteb, nwg yog ib tug namtsev kws muaj kev ntseeg hab nwg coj nwg tsev tuabneeg pehawm Vaajtswv tsi tu ncuas. Nwg yog tswvcuab huv First Hmong Baptist Church txij 1979 lug txug nub nwg tau tso nplajteb tseg. Nwg muaj noobnyoog khwvyeeg le 97 lub xyoo. Thov Yexus Khetos tuav nwg teg coj nwg kev moog nyob Ceebtsheej tog nub peb suavdlawg yuav rov sis ntsib nwg dlua.

Lug Ua tsaug
Ntsuab Yaaj tso rua nwg pawgntseeg First Hmong Baptist Church ua hab dlha dlejnum huv lubnteeg, yog le pawgntseeg nrug rua tsev xyomncuab zoo sab ua tsaug rua cov pawgntseeg kws cev teg tuaj paab hab tuaj koom. Ua tsaug rua cov xibfwb muab lug qhuabqha. Ua tsaug rua cov tuaj sib paab ua txhua tegnum hab txhua theemnum huv lubnteeg. Ua tsaug rua tsoom kwvtij, neejtsaa, tsoom phoojywg ntsuabze nyob dleb hab nyob ze tau tuaj saib hab muaj tshaavntuj tuaj paab, vim muaj suavdlawg txuj kev hlub kws yog sijhawm, dlaagzug, nyajtxag, paajntoos, hab khoomnoj haus tuaj paab. Pawgntseeg hab tsev xyomcuab txhaj ua lubnteeg tav moog rua qhov zoo. Yog tshuav qhovtwg, leejtwg peb has tsi txug lossis nqug tsi tau lossis peb tsuas ua tu ncaab tu ncuas los thov mej tsi xob tu sab, tsi xobthuam hab tsi xob ywg tabsis nrug qha, nrug khu kuas zoo. Thov Vaajtswv foom txujkoob txujmoov zoo rua txhua txhua tug. Thanks from the church and the families.